Qırımtatar Hıdırlez bayramına bağışlanğan merasimlerniñ keçirilmesi sebebinden mayıs 3-te Aqmescit-Bağçasaray yolunda maşina areketi zor oldı. Bunı «RİA Novosti» agentligi bildire.
Agentlikniñ bildirgenine köre, Yol areketi havfsızlığı boyunca devlet teftişiniñ tahminen 10 erkânı yol areketini idare ete.
«Bayram iştirakçileriniñ avtobuslarını ve musafirlerini merasim keçirilgen yerinde yerleşken qoşma turaqlarğa yibereler. Qalğanlar içün merasim keçirilgen yerge keçmege biraz qolaysızdır», – dep aytıla beyanatta.
Agentlikniñ mühbiri bütün yer yol konuslarınen qoralanğanını, evakuatorlar çalışqanını qayd etti.
2016 senesi mayıs 3-te Rusiyege boysunğan Qırım ükümeti qrırımtatar Hıdırlez bayramını teşkil ete. Bayram programmasında Qırımnıñ çeşit regionlarından ketirilgen milliy çadırlar tiklenilecek. Bu yerde qırımtatar halqınıñ ayat tarzı ve adetleri, dekorativ-ameliy sanat ustaları işleriniñ sergisi, milliy aşlar ve Dağıstanlı canbazlarnıñ çıqışları taqdim etilecek.
İçtimaiy ağlarda rusiyeli Qırım ükümeti devlet müessiselerde çalışqanlarnı ve mektep talebelerini bayramğa kelmege mecbur etken vesiqa derc etildi.
Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.
Qırımdan köçkenler Hıdırlez bayramına bağışlanğan merasimlerni qıtaiy Ukrainada teşkil eteler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
