Link açıqlığı

Qırımtatar resurs merkezi Rusiye tarafından işğal etilgen Qırımda 2016 senesi aprel ayı devamında yüz bergen vaqialar ve qanun bozuvları boyunca talilni taqdim etti.

Merkezde, hususan, aprel 1-de Aqmescit rayonınıñ Colman (Pionerskoye) köyünde yüz bergen qırımtatarlarnıñ kütleviy yaqalavları kibi eñ esas qanun bozuvları qayd etildi.

«Er kesniñ parmaq izlerini, tükürçikni aldılar, fotoresimler yaptılar ve sorğuğa çektiler», – qayd etile talilde.

Bundan da ğayrı, merkezniñ tarafından toplanılğan qanun bozuvları arasında Aqmescitteki ötmek furunında tintüvler, rusiyeli uquq qoruyıcılarnıñ Qırımtatar Qurultayı teftiş komissiyasınıñ reisi Ali Özenbaşnıñ Aqmescitteki evine kirmege ıntıluvı, mahkemeci tarafından «fevral 26 işi» boyunca qabaatlanğanlarnıñ apiste bulunma müddetiniñ uzattırılması ve olardan biri olğan Ahtem Çiygozğa qarşı yañı qabaatlavlarnıñ peyda olması, «Hizb ut-Tahrir» ile bağlı olğanında qabaatlanğanlarnıñ apiste bulunma müddetiniñ uzattırılması, bazarlarda yaqalavlarnen neticelengen reydler, yarımadada Meclis faaliyetiniñ yasaq etilmesi, Qırım mühbirleriniñ evlerinde tintüvler ve olardan biri olğan Nikolay Semenanı separatizmde qabaatlav ve diger qanun bozuvlarıdır.

Umumen olaraq, talilde 60-dan ziyade qanun bozuvı qayd etile.

Fevral ayında Avropa parlamenti Rusiye tarafından işğal etilgen Qırımda Qırım sakinleriniñ, hususan qırımtatarlarnıñ aq-uquqlarını «yüksek seviyede» bozuvını takbih etti.

Rusiyeli Qırım ükümeti yarımadada insan aqları bozuvları aqqında malümatnı red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG