Link açıqlığı

Mayıs 3-te, salı künü Qırımda «Şaherezada» medeniy-eglence merkeziniñ territoriyasında (Aqmescit-Bağçasaray yolunıñ 25-ci kilometr) Qırımnıñ rusiyeli ükümeti tarafından qırımtatar milliy «Hıdırlez» bayramına bağışlanğan merasim teşkil etilecek.

Rusiyege boysunğan Qırım ükümetiniñ Kurort ve turizm nazirliginiñ matbuat hızmetiniñ bildirgenine köre, merasim çerçivesinde davulcılar ansambliniñ refaqatında bayraq şou, Qırımnıñ icadiy taqımlarınıñ kontserti, programma iştirakçileri ve musafirleri tarafından ananeviy Horan oyunı, qırımtatar milliy küreş yarışı keçirilecek.

Bayram programmasında Qırımnıñ çeşit regionlarından ketirilgen milliy çadırlar tiklenilecek. Bu yerde qırımtatar halqınıñ ayat tarzı ve adetleri, dekorativ-ameliy sanat ustaları işleriniñ sergisi, milliy aşlar taqdim etilecek.

Matbuat hızmetiniñ malümatına binaen, ilk sefer Hıdırlez bayramı meydanında canbazlar (arqanda yürgen insanlar) iştirak etecek. İcadiy köstermelerni Dağıstan Cumhuriyetiniñ ustaları taqdim etecek.

Bundan evel Qırımtatar Milliy Meclisiniñ temsilcileri Qırımnıñ rusiyeli ükümeti tarafından teşkil etilgen Hıdırlez bayramına bağışlanğan merasimlerde iştirak etmege red etkenlerini bildirdi. Böyle merasimlerden vatandaşlarnı da vazgeçmege çağırdılar.

Qırımdan köçkenler Hıdırlez bayramına bağışlanğan merasimlerni qıtaiy Ukrainada teşkil eteler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG