Odessadaki Kulikovo pole meydanı yanında bir insan elâk oldı. Bunı Odessa vilâyeti politsiyasınıñ matbuat hızmeti bildire.
«Bu vaqianıñ bütün sebeplerini ögrenüv neticesinde 37 yaşındaki aqay kişi yaramay olğanı ve o esini coyğanı aqqında malümat belgilendi. Ekimler insanğa yardım etmege tırıştı, amma bütün ğayretler muvafaqiyetsiz oldı. Tıbbiy yardım hadimleri vatandaşnıñ ölgenini qayd etti», – dep bildire Azatlıq Radiosı matbuat hızmetiniñ malümatını.
Politsiyada qayd etkenlerine köre, vefat etken insannıñ ölümi sebebini ögrenmek içün onıñ cesedini mahkeme-tıbbiy taqiqatqa yolladılar.
Odessadaki Kulikovo pole meydanında mayıs 2-de saat 14:00 aktsiyanıñ keçirilmesi planlaştırılğan edi. Aktsiya 2014 senesi mayıs 2-de yüz bergen kütleviy nizamsızlıq vaqialarınıñ qurbanlarınıñ hatırasına bağışlanğan. Amma merasim alâ daa başlanmadı, çünki uquq qoruyıclar havflı maddelerni qıdıruv boyunca teşkermeler devam etkeni sebebinden insanlarnı Kulikovo pole meydanına yibermeyler.
Mayıs 2-de saba Kulikovo pole meydanında «bomba bar olğanı» aqqında malümat peyda oldı. Adamlar meydan yanında toplaşa, çiçeklerni qoya.
Bugün Odessadaki Külikovo pole meydanında 2014 senesi mayıs 2-de yüz bergen facialı vaqialarnıñ bir yıllığınen bağlı aktsiyalarnıñ keçirilmesi planlaştırılğan.
2014 senesi mayıs 2-de Odessa merkezinde futbol mühlisleri ve ukrain quvetleriniñ marşına Rusiye tarafını tutqan faaller silânen ucum etti. Marşnıñ altı iştirakçisi öldürildi. Bundan soñ Ukraina tarafını tutqanlar yañı numayışnı teşkil etti ve Kulikovo pole meydanına yol aldılar, o yerde Rusşye tarafını tutqan faallerniñ çadır lageri buluna edi.
Rusiye tarafını tutqan faaller ve olarnıñ tarafdarları Zenaat birlikleri evinde saqlandı. Eki taraf bir birine yanıcı qarışmanen şişeler ata edi.
Binada yüz bergen yanğın neticesinde, binadan sekirmek ıntıluvlar ve Rusiye tarafdarları silâ qullanğanları sebebinden o yerde davanıñ eki tarafından daa 42 insan elâk oldı. Bunen beraber, o kün tahminen 200 insan yaralandı.
