Link açıqlığı

«Almenda» vatandaşlıq maarifi merkezi «Bloknotlarda deñiz» leyhasınıñ başlanmasını ilân etti. Leyha Qırım sakinleriniñ Ukrainanen bağları aqqında şahsiy ikâyelerine bağışlanğan.

«Aktsiya maqsadı şahsiy ikâyeler vastasınen Qırımnıñ qıtaiy Ukrainanen bağını köstermektir. Leyha çerçivesinde Qırım sakinlerine sanat ve şahsiy ikâyeler vastasınen Qırım ne qadar Ukrainanen bağlı olğanını köstermege teklif etile. Coğrafik yerleşmesinen degil de, siyasiy mefküre ve iqtisatnen degil de, amma yañı peyda olğan sıñırlarnıñ eki tarafında bir-birlerine duyğular «deñizi» qalğan adamlarnen», – qayd eteler «Almenda» merkezinde.

Leyhada iştirak etmek içün Qırım sakinlerine bloknotta olarnı qıtaiy Ukrainanen bağlağan duyğularnı ifadelemege ve olarnıñ Qırım manzarasında fotoresimini yapmağa teklif etile. Bunen beraber, bloknotlarda siyasiy şiarlar qabul etilmez, dep evelden haber ete leyha müellifleri.

Leyha çerçivesinde resimlerni «Almenda» merkeziniñ elektron adresine iyün 1-ge qadar yollamaq kerek.

Eñ yahşı işlerniñ Halqara qabaatsız balalar – tecavuz qurbanları kününe (International Day of Innocent Children Victims of Aggression) bağışlanğan merasimlerde taqdim etilecegi aqqında vade eteler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG