Mayıs 18-de, qırımtatar halqınıñ sürgünlik qurbanlarını añma kününde Rusiye imperator eviniñ yolbaşçısı, knâginâ Mariya Vladimirovna ve varis tsesareviç ve knâz Georgiy Mihayloviç Baçğasaraydaki «Devlet-Saray» tarihiy-medeniy kompleksini ziyaret etecekler.
Bu aqta «Larişes» Qırım tarihiy müzeyiniñ müdiri Guliver Altın Facebook saifesinde bildirdi.
Mayıs 18-de saba Aqmescitteki qırımtatar sürgünlik qurbanları hatıra abidesine çiçekler qoyulacaq, soñra Bağçasaray Hansarayı, Svâto-Uspenskiy keşişhanesi ve «Devlet-Saray» tarihiy-medeniy kompleksi ziyaret etilecek.
«Qırımtatar ziyalılarınıñ temsilcileri ile körüşüv keçirilecek ve barışıq içinde beraberlikte yaşama fikrini yayınlağan ve Qırımnıñ barışıq territoriyası olaraq ve Bağçasaraynıñ keçken asırlar devamında halqlarnıñ ve dinlerniñ barışıqta yaşaması boyunca tarihiy tecribesine saip olğan şeer olaraq populârlaştırılmasına bağışlanğan muzakereler meydançığı – «Bağçasaray – barışıq tarihınıñ saibi olğan şeer» mevzulı tögerek masa teşkil etilecek», – dep qayd etti Altın.
Ziyaret çerçivesinde qırımtatar maarifçisi İsmail Gasprinskiyniñ mezarına çiçekler qoyulacaq, XV-XVI asırlarına ait tarih ve mimarcılıq abideleri, Qırım tarihiy müzey-qoruğınıñ ekspozitsiyaları ve sergileri ziyaret etilecek, dep qayd etti «Larişes» Qırım tarihiy müzeyiniñ müdiri.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
