Link açıqlığı

Putin Rusiyede qaçaqlarğa yaşama yeri vesiqaları berilmesiniñ sadeleştirilmesi aqqında qanunnı imzaladı


Rusiye prezidenti Vladimir Putin

Rusiye prezidenti Vladimir Putin Rusiyege Ukraina ve diger devletlerden köçken qaçaqlarğa yaşama yeri vesiqalarınıñ qolay şekilde berilmesi aqqında qanunnı imzaladı.

Uquq malümatı resmiy internet-portalında derc etilgen vesiqağa binaen, yaşama yeri vesiqalarınıñ qolay şekilde berilmesi imkânı Rusiye territoriyasına acele kütleviy şekilde köçken ve Rusiye territoriyasında qaçaq statusını alğan ya da Rusiyege vatandaşlarnıñ öz isteginen köçmege destek programmasınıñ iştirakçisi olğan yabancı vatandaşqa ya da onıñ qoranta azasına berile.

Bu qanun onıñ resmiy şekilde derc etilgeninden 90 kün keçken soñ işke tüşürile.

Keçken sene noyabr 1-den başlap Ukraina vatandaşlarınıñ Rusiye territoriyasında bulunmasınıñ imtiyazlı nizamı işlemey. O vaqıttan berli ukrainliler Rusiye territoriyasında ruhset bergen vesiqalar (iş patenti, muvaqqat yaşama ruhseti ve digerler) olmadan, 180 devamında 90 kün buluna bile. Lâkin, Rusiye Federal köçme hızmetinde bildirilgenine köre, istisna «Ukrainanıñ cenüp-şarqiy vilâyetlerinden acele kütleviy şekilde köçken» Ukraina vatandaşları içün yapıldı, «olar içün bulunma nizamı aynı qaldı».

Keçken sene küzde Rusiye Federal köçme hızmetinde ilân etkenlerine köre, 2014 senesi aprel ayından başlap Rusiye territoriyasına Donbasstan milliondan ziyade ukrain keldi, 2015 senesi oktâbr ayına qadar yaşama yeri vesiqasını almaq içün 65 952 insan muracaat etti.

Birleşken Milletler Teşkilâtı Rusiyede Donbasstan köçken 30 bin qaçaqnıñ bulunmasını tasdıqlap oldı.

2014 senesi aprel ayından başlap Donetsk ve Lugansk vilâyetleriniñ bir qısmında cenk devam ete. Ukraina ve Ğarp Moskvanı Rusiye tarafını alğan Donbasslı separatistlerge destek köstergeninde qabaatlaylar, Rusiye bu qabaatlarnı red ete, «göñülliler» aqqında laf yürsetile bilgenini aytıp.

XS
SM
MD
LG