Rusiye paytahtı Moskvada aprel 30-da aqşam Lubânskaya meydanında tek kişilik numayışları teşkil etildi. Bu meydanda Federal havfsızlıq hızmetiniñ baş ofisiniñ binası yerleşe.
Numayış iştirakçileri ukrain ve rusiyeli siyasiy mabuslarnı azat etmege talap ettiler. Aynı vaqıtta olar yaqında Rusiye tarafından işğal etilgen Qırımdaki mahkeme tarafından yasaq etilgen Qırımtatar Milliy Meclisine qol tutqanlarını kösterdiler.
Bundan evel, 2016 senesi #LetMyPeopleGo uquq qoruyıcı şirketi Rusyede ve işğal etilgen Qırımda siyasiy sebeplerden yaqalanğan ukrainlerniñ tarihını bildirgen esapnı derc etti.
Rusiye apishanelerinde bulunğan eñ belli mabuslar – Nadejda Savçenko, Oleg Sentsov, Aleksandr Kolçenko, Ahtem Çiygoz, Stanislav Klih, Nikolay Karpük ve digerler. Uquq qoruyıcılarnıñ malümatına binaen, 13 ukrain siyasiy mabusı Rusiyede, daa 12 mabus Rusiye tarafından işğal etilgen Qırımda buluna.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Halqara toplulıq Rusiye tarafından Meclis faaliyetiniñ yasaq etilmesini takbih etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
