Link açıqlığı

İslâmov «Ukraina terkibinde Çelebicihan batalyonı» qırımtatar ordusınıñ teşkil etilmesi kerek olğanında emin


Qırım qamaçavı aktsiyasınıñ ştab yolbaşçısı Lenur İslâmovnıñ qayd etkenine köre, yarımadada Meclis faaliyeti yasaq etilgen soñ qırımtatar halqı öz ordusınıñ teşkil etilmesi kerek olğanını añlay. Bu aqta on Qırım.Aqiqatqa bergen izaatında bildirdi.

«Belki, şimdi qırımtatar halqı öz ordunı teşkil etmek kerek olğanını añlar. Bizim siyasiy küçlerimiz bar, Yuqarı Rada deputatlarımız bar, amma öz ordumız yoq. Bunıñ içün ordumız, Ukraina terkibinde Noman Çelebicihan batalyonı olması içün er şey yapmalımız. Milliy siyasetimizde yañı yöneliş teşkil etmege isteymiz», – dedi Lenur İslâmov.

Qırım qamaçavı aktsiyasınıñ ştab yolbaşçısınıñ tahmin etkenine köre, Meclis yasaq etilgen soñ «er angi qırımtatarnı ekstremist olaraq tanımaq mümkün».

«Men şunı aytam ki, ATR, soñ Meclis, soñra da bütün qırımtatar halqı yasaq etilecek. Böyle qarar kim aldı?», – dep o Kremlge boysunğan Qırım Yuqarı mahkemesiniñ Meclis faaliyetini yasaq etmek qararına izaat berdi.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Halqara toplulıq Rusiye ükümetiniñ Meclis faaliyetini yasaq etmek qararını takbih etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG