Link açıqlığı

«Eurovision-2016» teşkilâtçıları yasaqlanğan bayraqlar içün afu soradı – Kütleviy haber vastaları


«Eurovision-2016» tarafından derc etilgen yasaqlanğan bir qaç bayraqnıñ qısmı

«Eurovision-2016» yır yarışınıñ teşkilâtçıları Stokgolmde keçirilecek yarış devamında qullanmağa yasaq etilgen bayraqlarnıñ cedvelini bildirgen derc etilgen vesiqa içün afu soradı.

BBC-niñ bildirgenine köre, beyanat «Avropa yayınlama birligi»niñ (European Broadcasting Union, EBU) resmiy Facebook saifesinde derc etildi.

Beyanatta yarış teşkilâtçıları evel derc etilgen vesiqa bugünki «Eurovision»nıñ bayraqlar boyunca siyasetiniñ azırlıq şekli olğanı aqqında bildirile.

«Bu vesiqa derc etilmemek kerek edi», – dediler birleşmede.

«Teşkilâtçılar bu sebepten özüni aqaretlengen duyğanlardan afu soray», – dep qayd eteler beyanatta.

Bayraq qullanılması siyasetini añlatqan vesiqanıñ soñki şekli Eurovision.tv saytında derc etilecektir.

Yasaq etilgen bayraqlar cedveline «Qırım Cumhuriyeti» bayrağı, qırımtatarlarnıñ bayrağı ve «Donetsk Halq Cumhuriyetiniñ» bayrağı kirdi.

Bu sene yır yarışında Ukrainanı Jamala qırımtatarlarnıñ sürgünligi aqqındaki «1944» yırınen temsil etecek.

«Eurovision-2016» yarışınıñ yarım finalları Stokgolm şeerinde mayıs 10 ve 12 künleri, finalı ise mayıs 14-te keçirilecek. Jamala ekinci yarım finalda 15 sanlı nevbette sanağa çıqacaq.

XS
SM
MD
LG