Rusiye tarafından işğal etilgen Qırımda Aqmescitteki Kiyev rayon mahkemesinde aprel 29-da, cuma künü «fevral 26 işi» boyunca qabaatlanğanlarnıñ apiste bulunması müddetiniñ uzattırılması boyunca eki toplaşuv keçirildi.
Birinci toplaşuv Qırımtatar Milliy Meclisiniñ reis muavini Ahtem Çiygoznıñ işinen bağlı oldı, onı mayıs 22-ge qadar apiste qaldırdılar. Diger eki apiste bulunğan qırımtatarğa – Mustafa Degermenci ve Ali Asanovğa mahkeme farqlı apiste bulunma müddetlerini belgiledi. Bu aqta Meclis reisiniñ muavini Nariman Celâl, Ali Asanovnıñ apayı Elnaranıñ sözlerine esaslanıp, bildirdi.
«Mustafa Degermenciniñ apiste bulunma müddetini iyül 31-ge qadar, onıñ aqayına ise avgust 8-ge qadar uzattırdı. Ahtem Çiygoznıñ apiste bulunma müddeti mayıs 22-ge qadar uzattırıldı», – dep yazdı Nariman Celâl Facebook saifesinde.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. 2016 senesi fevral ayında rusiyeli Qırım Yuqarı mahkemesiniñ toplaşuvında bu işni tekrar taqiq etilmesine yollamağa qarar alındı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
