Link açıqlığı

Ukraina Birleşken Milletler Teşkilâtınıñ Havfsızlıq şurasını Rusiyeden qırımtatarlarnıñ aqlarını ğayrıdan tiklemege talap etmege çağıra


Ukraina Birleşken Milletler Teşkilâtınıñ Havfsızlıq şurasını Rusiye Federatsiyasından qırımtatarlarnıñ aqlarını ğayrıdan tiklemege talap etmege çağıra. Bu aqta cumaaqşamı künü, aqşam Nyu-Yorkta keçirilgen BMT Havfsızlıq şurasınıñ toplaşuvı devamında Ukraina Tışqı işler nazirligi apparatınıñ yolbaşçısı-nazir muavini Vadim Pristayko ilân etti.

Tışqı işler nazirliginiñ temsilcisi yarımada Rusiye tarafından işğal etilgen soñ qırımtatar halqınıñ til ve medeniyeti ğayıp olma havfı astında qalğanına, Qırımtatar Milliy Meclisiniñ faaliyeti ise yasaq etilgenine diqqat etti.

Bunen beraber, o Qırımnıñ işğalci ükümeti qırımtatarlarğa qarşı 130 cinaiy iş açqanını, qırımtatar temsilcilerinden 20 insan hırsızlanğanını, 9 kişi ğayıp olğanını qayd etti.

«Men Havfsızlıq şurasını Rusiyeden qırımtatarlarnıñ aqlarını ğayrıdan tiklemege talap etmege çağıram», – dedi Pristayko, Donbassta ve Rusiye tarafından işğal etilgen Qırımda rusiyeli basım devam etkeninen bağlı, Ukraina teşebbüsinen çağırılğan BTM Havfsızlıq şurasınıñ açıq toplaşuvınıñ iştirakçilerine.

2015 senesi oktâbr ayından başlap Ukraina Birleşken Milletler Teşkilâtınıñ Havfsızlıq şurasınıñ daimiy olmağan azası ola.

Qırım Rusiye tarafından işğal etilgen ve Donbassta silâlı dava bağlaşan soñ teşkilât Ukrainadaki vaziyetinen bağlı bir qaç sefer toplaşuv keçire edi.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG