Link açıqlığı

Qırımda sürgünlik qurbanlarına bağışlanğan abideni qurmağa aşıqmaylar


Ukraine – The Crimea map Crimea peninsula

Rusiye tarafından işğal etilgen Qırımda Bağçasaray rayonınıñ Süyren stantsiyasında qırımtatarlarnıñ sürgünlik qurbanlarına bağışlanğan abideniñ qurulmasına «bücet parasından bir kapık» qullanılmadı. Süyren stantsiyasından 1944 senesi adamlarnen eşelonlar sürgünlik yerlerine ketti.

Bu aqta Kremlge boysunğan Qırım parlamentiniñ matbuat hızmeti bildire.

«18 mayıs matem kününe qadar az vaqıt qaldı, amma qurucılıq işleri etilecek yerde, hatıra işareti ve 2015 senesi qoyulğan kapsuladan ğayrı, alâ daa bir şey yoq... Alâ daa «bu leyhağa ayırılğan bücet parasından bir kapık qullanılmadı», – dep bildire matbuat hızmeti milletlerara munasebetler boyunca parlament komitetiniñ reisi Edip Gafarovnıñ sözlerini.

Onıñ sözlerine binaen, mayıs 18-ge qadar, yani Sürgünlik qurbanları hatıra kününe qadar Süyren stantsiyasında sürgünlikniñ facialı timsali olğan mahsus vagonnıñ qoyulması planlaştırıla.

Matbuat hızmetiniñ qayd etkenine köre, «Soñki aile» adlı taqım eykeli nevbetteki abide olacaqtır, onıñ qurulması 2017 senesine planlaştırıla, müzey ve eki diniy bina (cami ve kilseçik) ise 2018 senesi qurulacaqtır.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG