Kremlge boysunğan Qırım Yuqarı mahkemesi «Hizb ut-Tahrir» işi» boyunca bütün 4 qabaatlanğan kişiniñ apiste bulunma müddetini uzattırmaq qararını lâğu etmedi. Bu aqta adliyeci Emil Kurbedinov bildirdi.
«Mahkeme imayeniñ iç bir delilini qabul etmedi ve Muslim Aliyev, Emir-Üsein Kuku, Enver Bekirov, Vadim Siruknıñ apiste bulunma müddetini uzattırmaq ilk mahkemeniñ qararını lâğu etmedi», – dep yazdı adliyeci Facebook saifesinde.
Bundan evel qabaatlı kişilerge mahkemeni red etmege lâğu ettiler.
Kremlge boysunğan Qırım Yuqarı mahkemesinde aprel 28-de, cumaaqşamı künü dört musulman – Muslim Aliyev, Enver Bekirov, Emir-Üsein Kuku, Vadim Siruknıñ apiste bulunması müddetiniñ uzattırılmasına qarşı şikâyetleri boyunca toplaşuv keçirildi.
Aprel başında Emil Kurbedinov yarımadada «Hizb ut-Tahrir» ile bağ tutqanında qabaatlanğan dört Qırım sakininiñ apiste bulunma müddetiniñ iyün ayına qadar uzattırılğanını bildirgen edi.
Bu sene fevral 11-12 künleri Rusiye uquq qoruyıcıları Qırımda islâmnı kütken insanlarnıñ evlerinde tintüvler keçirip, bir qaç kişini yaqaladı. Umumen olaraq, 14 insan yaqalandı, olarnıñ dörtü apis etildi: Yaltadan İnsan aqları boyunca Qırım kontakt gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta regionınıñ sakini Muslim Aliyev ve Yaltalı Vadim Siruk. Federal havfsızlıq hızmetiniñ taqiqatçıları olarnı Rusiyede yasaq etilgen «Hizb ut-Tahrir» teşkilâtınıñ faaliyetinde iştirak etkenlerinde qabaatladı. Episi dört kişi şimdiki vaqıtta Aqmescitteki SİZOda buluna.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
