Aprel 28-de «Hizb ut-Tahrir» işi» boyunca mahkemede qabaatlanğanlar mahkeme ve prokurornı red etüvni ilân etti. Bu aqta adliyeci Emil Kurbedinov bildirdi.
«Bütün qabaatlanğanlar ve imayeciler mahkemeni red etüvni ilan ettiler. Mahkemeci red etüvni lâğu etti. Şimdiki vaqıtta prokurornıñ red etilüvi baqıla. Bellesem, o da qanaatlendirilmez», – dep yazdı o Facebook saifesinde.
Kremlge boysunğan Qırım Yuqarı mahkemesinde aprel 28-de, cumaaqşamı künü dört musulman – Muslim Aliyev, Enver Bekirov, Emir-Usein Kuku, Vadim Siruknıñ apiste bulunması müddetniñ uzattırılmasına qarşı şikâyetleri boyunca toplaşuv başlandı.
Bu sene fevral 11-12 künleri Rusiye uquq qoruyıcıları Qırımda islâmnı kütken insanlarnıñ evlerinde tintüvler keçirip, bir qaç kişini yaqaladı. Umumen olaraq, 14 insan yaqalandı, olarnıñ dörtü apis etildi: Yaltadan İnsan aqları boyunca Qırım kontakt gruppasınıñ azası Emir-Usein Kuku, Yalta rayonınıñ sakini Enver Bekirov, Aluşta regionınıñ sakini Muslim Aliyev ve Yaltalı Vadim Siruk. Federal havfsızlıq hızmetiniñ taqiqatçıları olarnı Rusiyede yasaq etilgen «Hizb ut-Tahrir» teşkilâtınıñ faaliyetinde iştirak etkenlerinde qabaatladı. Episi dört kişi şimdiki vaqıtta Aqmescitteki SİZOda buluna.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
