Rusiye tarafından işğal etilgen Qırımda aprel 29-da, cuma künü Aqmescitteki Kiyev rayon mahkemesinde eki toplaşuv keçirilecek, toplaşuvlar «fevral 26 işi» boyunca qabaatlanğanlarnıñ apiste bulunmasınıñ devam ettirilmesinen bağlı olacaq. Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.
«Yarın, aprel 29-da saat 14.00 Aqmescitteki Kiyev rayon mahkemesinde Ahtem Çiygoznıñ apiste bulunması müddetiniñ uzattırılması boyunca toplaşuv keçirilecek. İhtimal, Ali Asanov ve Mustafa Degirmenciniñ müddetleri de, bir saat farqınen, devam ettirilecek!» – yazdı o Facebook saifesinde.
Aprel 21-de Moskvağa boysunğan Aqmescitteki Kiyev rayon mahkemesi Qırımtatar Milliy Meclisiniñ reis muavini Ahtem Çiygozğa apiste bulunma müddetini mayıs 5-ke qadar devam ettirdi.
Çiygoznıñ adliyecisi Nikolay Polozovnıñ bildirgenine köre, müddetniñ uzatılmasınıñ sebeplerinden biri olaraq mahkemeci «Çiygoz A.Z. «Qırımtatar Milliy Meclisi» liderleri Çubarov R. ve Cemilev M. ile bağ tuta, olar Ukraina territoriyasında bulunıp, Qırım Cumhuriyetinde siyasiy vaziyetni kerginleştirmek içün Rusiyege qarşı faaliyet alıp baralar» dep ayttı.
Mayıs 5-te bu iş boyunca taqiqat müddeti soñuna yete.
Aprel 15-te adliyeci Ahtem Çiygozğa qarşı onı «fevral 26 işi» boyunca zorbalıq ve mülkiyetni bozuv ile yapılğan kütleviy nizamsızlıqta qabaatlı olaraq mesüliyetke celp etmek içün qarar alınğanını bildirdi.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
