«1+1» telekanalınıñ sımarışınen «Sotsis» şirketi tarafından teşkil etilgen sorav neticeleri soraştırılğan ukrainlerniñ 48,9 fayızı Qırım Ukrainağa qaytarılacaq, dep bellegenini qayd ete. Daa 45,5 fayız yarımadada Ukraina nezaretiniñ qaytarılmasına inanmay, dep bildirile ukrain telekanalınıñ saytında.
Bundan da ğayrı, 5,6 fayız cevap berip olamağanı qayd etile.
Elde etilgen malümatqa binaen, Qırımnıñ işğalden azat etilmesi boyunca eñ müsbet keyfler devletniñ ğarbiy (65,8%), merkeziy (51,9%) ve şimaliy (51,9%) regionlarında üküm süre. Bunen beraber, «yarımada iç bir vaqıt ukrain olmaycaq» dep sayğan insanlarnıñ çoqusı (63,3%) şarqiy vilâyetlerde yaşay.
Müdetten bağlı ise, soraştırılğan ukrainlerniñ 27,5 fayızı Ukraina işğal etilgen Qırımda nezaretini 5 yıldan soñ ya da ziyade, 13,7% 3,5 yıldan soñ qaytaracağını qayd etti, 7,7% ise Qırım Ukrainağa yaqın 1-2 yıl içinde qaytacağına ümüt besledi. Bunen beraber, müsbet cevap bergen ukrainler devletniñ ğarbiy regionlarında yaşay, dep bildirile ukrain telekanalınıñ saytında.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
