Qırım Muhtar Cumhuriyetindeki Ukraina prezidenti Temsilciliginiñ vatandaşlar ile çalışma boyunca hızmetiniñ yolbaşçısı Maksim Kojemâka ukrain pasportlarını coyğan ve onı ğayrıdan yapmağa istegen Qırım sakinlerine saylayıcılar cedvelini qullanmağa tevsiye etti. Bu aqta o Qırım.Aqiqat Radiosınıñ saba yayınında bildirdi.
«Ukraina vatandaşı evel iç olmağanda saylavlarda iştirak etken olsa, demek ki, o mıtlaqa yekâne cedvelde, yani saylayıcılar cedvelinde qayd etilgen. Ve onıñ evel Ukraina vatandaşı olaraq saylavlarda iştirak etkeni, ihtimal, onı evel pasport alğan Ukraina vatandaşı olğanını tanımaq mümkün», – dedi o.
Bundan da ğayrı, Maksim Kojemâka işğal etilgen Qırımnıñ sakinlerine pasportnı yañıdan yapmaq içün kerek olğan vesiqalarnı evelden azırlamağa tevsiye etti. Böyle alda sıñırnı pasportsız keçmek mümkün olacaq.
«Memuriy sıñırdan keçken vatandaş sıñırcılarğa onıñ maqsadı Devlet köçüv hızmetini ziyaret etip, pasport yapması olğanını bildire bile. Yanında doğum şeadetnamesi, kerekli vesiqalar bar olğanını ve evelden devlet organlarına muracaat etkenini bildirmeli», – qayd etti o.
«Referendumdan» evel Qırımda onıñ ideologları yarımadanıñ Ukrainadan ayırılğan soñ ukrain ükümeti tarafından evel berilgen bütün vesiqalar qabul etilecegi aqqında söz bergen edi. Amma vesiqalarnıñ çoqusı şimdi tanılmay. Bunen beraber, işğalden soñ Ukraina yarımadanıñ rusiyeli ükümeti tarafından berilgen vesiqalarnı qabul etmey.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
