Link açıqlığı

Saatnıñ esas haberi

Türkiye Tışqı işler nazirligi: qırımtatarlarnı kene de qorquzmağa tırışalar


Türkiye Tışqı işler nazirligi Rusiyege boysunğan Qırım Yuqarı mahkemesiniñ Qırımtatar Milliy Meclisni yasaq etmek ve onı ekstremistik teşkilâtları cedveline kirsetmek qararını takbih etti. Bu aqta «Anadolu» türk haber agentligi bildire.

Ankarada mahkemeniñ bu qararını qırımtatarlarnıñ birdemligi ve bütünligini közlegen soñki adımlar alqası dep adlandırdı. Qayd etilgenine köre, qırımtatarlarğa nisbeten basım Qırımnıñ Rusiye tarafından qanunsız işğal etilgeninden soñ başlandı.

«Qırımtatarlarnı kene de qorquzmağa tırışalar. Biz bu qararğa yazıqsınamız ve onı takbih etemiz, bu qarar yarımada sakinleriniñ aq-uquqlarına qarşı yapılğan sistematik, kütleviy basqındır. Türkiye qırımtatar halqınıñ qanuniy küreşine ve bu kibi basımlarnı yoq etmek içün yapılğan ğayretlerge destek köstermege devam etecek», – bildirile beyanatta.

Türkiye Tışqı işler nazirliginde Qırımtatar Milliy Meclisi qırımtatar halqınıñ qanunğa uyğan şekilde saylanğan organı olğanını, ve onıñ demokratik şekilde teşkil etilmesini ve böyle etip qırımtatarlarnıñ menfaatlarını akis etkenini qayd etti.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG