Link açıqlığı

Rusiyege boysunğan Aqmescit memuriyetinde «Nezaketli insanlarğa» bağışlanğan abideniñ qoyulacaq yerini belgilediler. Bu aqta müessiseniñ matbuat hızmeti bildire.

«Aqmescit şeeriniñ memuriyetinde «Nezaketli insanlarğa» – rusiyeli ordunıñ zabitlerine bağışlanğan abideniñ yapılması ve tiklenilmesi meselesi boyunca toplaşuv keçirildi... «Nezaketli insanlarğa» bağışlanğan abideniñ qoyulacaq yeri belgilendi – «Cumhuriyet şeer bağçası», – dep bildirile beyanatta.

Şeer bağçası Qırım parlamenti yanında yerleşe. Şimdiki vaqıtta skver territoriyasında alman-faşist basqıncılarından şeerniñ boşatılmasını añdırğan tank abidesi yerleşe. Şeer bağçası yanında Aleksandr Nevskiy kilsesi yerleşe.

Abideni tiklemek teşebbüsini 2015 senesi iyün ayında Qırım deputatları kösterdi. Yarımadada abide içün para toplanması aqqında ilân etildi, amma Qırım sakinleri bu işte faal olmadı, bundan da ğayrı, abide leyhası boyunca yarış devam ettirile edi.

2014 senesi Qırımda referendum keçirilgen vaqıtta yarımadada tanıtma işaretleri olmağan insanlar peyda oldı, olar ukrain ordusınıñ areketlerini blok ete ediler.

Bundan soñ, Rusiye prezidenti Vladimir Putin «Nezaketli insanlar» Rusiye Silâlı quvetleriniñ hadimleri olğanını tanıdı.

«Nezaketli insanlarğa» bağışlanğan çoyun abidesi 2015 senesi Amur vilâyetinde peyda oldı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG