Link açıqlığı

İçtimaiy ağlarda ‪#‎IamCrimeanTatar (Men qırımtatarım – QA) hashtag ile resimlerniñ sayısı arta. Böyle etip, Kremlge boysunğan yarımada prokuraturasınıñ teşebbüsi ile Qırımtatar Milliy Meclisiniñ yasaq etilmesi aqqında belli olğan soñ, internet qullanıcıları qırımtatar halqına destek köstere.

Qırım, Ukraina ve bütün dünyadaki faaller içtimaiy ağlarda qırımtatar milliy timsallerinen «Men qırımtatarım» şiarı ile öz resimlerinen paylaşalar.

Aktsiyağa cemaat erbapları, jurnalistler, devlet ve diplomatik müessiseleriniñ hadimleri qoşula.

İlk sefer #‎IamCrimeanTatar hashtag ile resimler 2014 senesi sentâbr ayında peyda oldı, o vaqıt bütün dünyadaki diplomatik müessiseleriniñ hadimleri Qırım Rusiye tarafından işğal etilgen soñ qırımtatarlarğa destek kösterdiler.

Rusiyege boysunğan Qırım ükümeti tarafından Meclis faaliyetiniñ yasaq etilmesi aktsiyanıñ yañıdan keçirilmesiniñ sebebi oldı.

«Şimdi işğal etilgen yarımadada yüz bergen repressiyalar işğalci ükümetiniñ zayıf olğanını ve rus ükümdarlığınıñ muvaqqat olğanınıñ delili ola. Kreml öz zayıflığını köstere; Qırımnı boysundırmaq içün bütün vastalar qulannılğanını köstere», – dep yazdı Facebook saifesinde Ukraina televizion ve radio yayınlaması boyunca Milliy şuranıñ azası Sergey Kostinskiy.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Tışqı işler nazirliginde Qırımtatar Milliy Meclisi faaliyetiniñ yarımadada yasaq etilmesini takbih etip, mahkeme qararını «cinayetçilik ve qanunsızlıq» dep adlandırdılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG