Link açıqlığı

Cemilev: Rusiye tarafından Meclisniñ yasaq etilmesi bütün Qırım halqı içün telükelidir


Mustafa Cemilev

Yaqın vaqıtta qıtaiy Ukraina territoriyasında bulunğan Meclis azalarınıñ toplaşuvı keçirilecek. Meclis faaliyeti işğal etilmegen Ukraina territoriyasında devam ettirilecek, merkezi Kiyev şeerinde olacaq. Bunı Qırımtatar halqınıñ meseleleri boyunca vekâletli Mustafa Cemilevniñ matbuat hızmeti Facebook saifesinde bildire.

«Meclis bu tek Qurultay tarafından gizli rey berüv ile saylanılğan 33 insan degil, amma bütün öz-özüni idare etüv milliy qurulışıdır. Bu 230 yerli ve regional meclisi, olarnıñ azaları, umumen olaraq, tahminen 2500 insan. İşğalciler olarnı ekstremist olaraq tanıy ve olarğa qarşı, şübesiz, repressiyalar yapacaqlardır. Böyle mantıqqa binaen, bu organlarnı saylağan insanlar da ekstremist ola. Rusiye özüne qarşı bütün Qırım halqını turğuza», – dep ayttı qırımtatar halqınıñ lideri, Ukraina halq deputatı Mustafa Cemilev.

Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.

Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.

Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG