Rusiye tarafından işğal etilgen Qırımda Muyedin Alvapovnıñ evine tintüv keçirmek içün keldiler, o yanvar ayında maşinalarnı yaqqanında şeklenilip yaqalandı. Bunı aprel 27-de, çarşenbe künü Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde bildirdi.
«Yigitni qabaatlı yapmaq ıntıluvlar muvafaqiyetli olmadı. Onıñ yaqalanmasından soñ yanğınlarnıñ sayısı eki qat arttı, endi olar onıñ soy-soplarına problema çıqaralar, o qabaatını tanısın dep», – bildirdi Smedlâyev.
Kremlge boysunğan Qırım İçki işler nazirliginiñ resmiy saytında er angi teşkermeler ya da taqiqat işleri aqqında malümat yoq.
Yanvar 23-te Alupkada 21 yaşındaki qırımtatar Muyedin Alvapov yaqalandı. Onı Qırımnıñ cenübiy yalısında maşinalarnı yaqqanında qabaatlaylar. 2016 senesi mart 14-te Kremlge boysunğan Akmescitteki Kiyev rayon mahkemesi Yaltada maşinalarnı yaqqanında şeklenilgen Muyedin Alvapovnıñ yaqalama müddetini mayıs 9-ğa qadar uzattı.
Alvapovnıñ yaqınları onıñ qabaatlı olmağanında eminler.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
