Link açıqlığı

Avropa Şurasınıñ baş kâtibi Meclisniñ yasaq etilmesi boyunca mahkeme qararını ğayrıdan baqıp çıqmağa çağırdı


Avropa Şurasınıñ baş kâtibi Turbyern Yagland

Avropa Şurasınıñ baş kâtibi Turbyern Yagland aprel 26-da, salı künü Kremlge boysunğan Qırım Yuqarı mahkemesiniñ Qırımtatar Milliy Meclisiniñ faaliyetini yasaq etmek qararını ğayrıdan baqıp çıqmağa çağırdı, ve bu qarar qırımtatarlarnıñ Qırımda vaziyetini kerginleştire bilgeniniñ sebebi ola bilecegini qayd etti. Bu aqta «İnterfax-Ukraina» bildire.

«Yaqında Avropa Şurasınıñ Nazirler komitetine taqdim etilgen maruza Meclisni ekstremistik teşkilâtı olaraq tanıması qırımtatarlarnıñ toplulığınıñ yabancılaşması ve yarımadada yaşağan ealiniñ qalğan qısmından uzaqlaşmasınıñ telükesi seviyesini arttıra bilecegini qayd ete», – dedi o.

«Bunıñ içün men mütenasip ükümet organlarınıñ bu qararnı deñiştirmek içün kerekli çarelerni tapmalarına çağıram», – qoştı o.

Bundan evel Avropa Şurasınıñ insan aqları boyunca komissarı Nils Muyjniyeks de mahkemeniñ bu qararını lağu etmege çağırdı.

Aprel 26-da, Kremlge boysunğan Qırım Yuqarı mahkemesi Qırımtatar Milliy Meclisini ekstremistik teşkilâtı olaraq tanımaq ve onıñ faaliyetini yarımada territoriyasında ve Rusiyede yasaq etmek qararını qabul etti. Böyle qararnı rusiyeli mahkemeci Natalya Terentyeva çıqardı. Bu qararnı lâğu etmek içün bir ay devamında muracaat etmek mümkün.

Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG