Qırımtatar Milliy Meclisi öz faaliyetini Qırımnıñ tışında devam etecek. Bunı Meclis reisiniñ birinci muavini Nariman Celâl Rusiyeden işğal etilgen Qırımdaki mahkemeniñ Qırımtatar Milliy Meclisiniñ faaliyetini yarımada territoriyasında yasaq etmek qararına izaat berip, Facebook saifesinde bildirdi.
«Qırımda Meclisni yasaq ettiler. Bizim içün beklenilgen bir qarardır. Amma, eminim ki, Qırımtatar Milliy Meclisi öz faaliyetini Qırımnıñ tışında devam etecek. Qırımda qalğanlar ise, bellesem, kelecek taqdirleri ve 2013 senesi Hansarayda boyunlarına alğan vazifeleri boyunca qarar alacaqlar», – qayd etti Celâl.
Meclis reisiniñ muavini adliyeci Cemil Temişev, Meclis temsilcisi Emine Avamileva, «Memorial» uquq qoruyıcı merkeziniñ adliyecileri, Ukrain Helsinka insan aqları boyunca gruppasınıñ uquqçıları, tamır halqlarınıñ aqları saasında ekspertlerge ve «zenaatdaşlar ve adiy vetandaşlarğa köstergen yardım ve destekleri içün» minnetdarlıq bildirdi.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.
Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
