Aqmescitte Qırımtatar Milliy Meclisi faaliyetiniñ yasaq etilmesi boyunca mahkeme toplaşuvında munaqaşa devam ete. Toplaşuvda Meclis reisiniñ birinci muavini Nariman Celâl qırımtatarlarnıñ temsilci organınıñ Birleşken Milletler Teşkilâtı, Avropada havfsızlıq ve işbirlik teşkilâtı (OSCE) ve diger dünyadaki müim teşkilâtlar tarafından desteklengeni aqqında bildirdi. Böyle etip, o mahkeme işi teşebbüsçisi, rusiyeli Qırım prokurorı Natalya Poklonskayanıñ Meclis terroristik teşkilâtları tarafından desteklengeni aqqında ilân etkenine izaat berdi.
«Poklonskayanıñ mantığına baqsaq, «Türk ocağı»nıñ Meclisniñ yasaq etilmesine yol bermemek içün şefaatı – Meclis ekstremistik teşkilâtı olğanını bildire! Nariman Celâl: böyle mantıqqa binaen, olarnıñ sırasına qırımtatar halqınıñ ananeviy müessisesini saqlamaq içün muracaatta bulunğan Birleşken Milletler Teşkilâtı, PACE, Avropa Birligini ve bir sıra diger halqara teşkilâtlarnı ve devlet yolbaşçılarını da kirsetmek kerek!» – dep bildirdi Nariman Celâlnıñ sözlerini Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde.
Nariman Celâldan soñ Meclisniñ diger temsilcisi Emine Avamileva da sözde bulunıp, Meclisniñ taqdirini tek qırımtatar halqı al ete bilgenini ilân etti.
Rusiyege boysunğan Qırım Yuqarı mahkemesi aprel 25-te, bazarertesi künü, aqşam toplaşuvnı aprel 26, salı kününe keçirdi.
Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
