Link açıqlığı

Smedlâyev: Başta Meclisni yasaq etecekler, soñra halqnı da yasaq etmege tırışacaqlar


Qırımtatar Qurultayınıñ Merkeziy saylav komissiyasınıñ reisi Zair Smedlâyev

Rusiyege boysunğan Qırım Yuqarı mahkemesi aprel 26-da Qırımtatar Milliy Meclisi faaliyetiniñ yasaq etilmesinen neticelene bile. Bu aqta aprel 25-te toplaşuvda bulunğan Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

Onıñ sözlerine binaen, mahkeme toplaşuvınıñ ceryanından «mahkeme, şübesiz, qanun tarafını degil de, qabaatlağan tarafını alacağını» añlamaq mümkün.

«Başta Meclisni, qırımtatar halqınıñ temsilci organını, yasaq etecekler, soñra halqnı da yasaq etmege tırışacaqlar! Bütün bular tarihımızda endi olğan edi, 1944 senesi em kommunistlerni, em faallerni, em de tarafta olğanlarnı çeşit vagonlarda, amma bir trende sürgün ettiler», – dep yazdı Smedlâyev Facebook saifesinde.

Rusiyege boysunğan Qırım Yuqarı mahkemesi aprel 25-te, bazarertesi künü, aqşam toplaşuvnı aprel 26, salı kününe keçirdi. Toplaşuv saat 9:30 başlanmalı.

Aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı. Poklonskaya toplaşuvda olmadı.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG