Link açıqlığı

Saatnıñ esas haberi

AQŞ, Almaniya, Frenkistan, İtaliya ve Büyük Britaniya liderleri Qırım işğalini qabul etmegenlerini tasdiqladı


Büyük Britaniya baş naziri Devid Kemeron, AQŞ prezidenti Barak Obama, Frenkistan prezidenti Fransua Olland, Almaniya kantsleri Angela Merkel ve İtaliya baş naziri Matteo Rentsi
Büyük Britaniya baş naziri Devid Kemeron, AQŞ prezidenti Barak Obama, Frenkistan prezidenti Fransua Olland, Almaniya kantsleri Angela Merkel ve İtaliya baş naziri Matteo Rentsi

Amerika Qoşma Ştatları, Almaniya, Frenkistan, İtaliya ve Büyük Britaniya liderleri bir daa Qırım işğalini qabul etmegenlerini tasdiqladı. Bunı Beyaz Saray (White House) matbuat hızmeti AQŞ prezidenti Barak Obamanıñ Almaniyağa ziyareti neticelerine binaen bildirdi.

AQŞ prezidenti Barak Obama, Büyük Britaniya baş naziri Devid Kemeron, Frenkistan prezidenti Fransua Olland, Almaniya kantsleri Angela Merkel ve İtaliya baş naziri Matteo Rentsi bu aqta aprel 25-te, bazarertesi künü Gannoverdeki Herrenzauzen isarında keçirilgen toplaşuvnıñ neticesinde ilân ettiler.

«Liderler Rusiyeniñ işğalci areketlerini ve onıñ Qırımnı işğal etmege ıntıluvlarını qabul etmegenlerini bir daa ilân ettiler. Olar Minsk añlaşmalarınıñ bütünley yerine ketirilmesini al etici qarar dep saydılar. Liderler Rusiyege qarşı sanktsiyalar Minsk añlaşmaları tolusınen yerine ketirilgen soñ lâğu etilecegini bir daa ilan ettiler», – dep bildire Beyaz Saray.

Berilgen malümatqa binaen, beş devlet yolbaşçılarınıñ muzakereleri transatlantik kün mevzusınıñ eñ aktual meselelerinen bağlı oldı. Liderler, büyük problemalarğa yol bergen Avropağa qanunsız köçüvniñ aqibetleri meselesiniñ kompleks şekilde çezilmesi kerek olğanı aqqında añlaştılar, bu ise Avropa ve AQŞ-nıñ qıymetlerini akis ete: bu NATO ve Avropa Birliginiñ faaliyetini, bundan da ğayrı, köçüvniñ esas sebepleriniñ ögüni almaqnı közde tuta.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG