Aprel 25-te Amerika Qoşma Ştatları prezidenti Barak Obama almaniyalı Gannoverde Avropa birdemligine çağırdı.
Onıñ sözlerine köre, dünyağa «küçlü ve birleşken Avropa» kerek.
Bundan da ğayrı, Obama NATO-nıñ er azasını Alyansnıñ işine isse qoşmağa çağırdı. Amerika prezidentiniñ ilân etkenine köre, iyül ayında Varşavada keçirilecek NATO sammitinde Alyansnıñ er azası havfsızlıq içün özüne mesüliyet almaq mecbur olmasına israr etecek.
Obama Avropa liderlerini Rusiyege qarşı, onıñ Ukrainanen davası içün, sanktsiyalarnı Moskva Minsk añlaşmaları boyunca öz mecburiyetlerini yapmağance devam ettirmege çağırdı.
Almaniyağa ziyaret Barak Obamanıñ 6 kün devam etken çetel memleketlerge seyahatınıñ soñki toqtav yeridir. Bu iş ziyareti çerçivesinde o, islâmcı taqımlarına qarşı küreş alıp barmaq, Rusiye tarafından Ukrainağa qarşı yapılğan basqıncılıqnı toqtatmaq ve halqara ticaretni rağbetlendirmek içün AQŞ-nıñ ittifaqdaşları ile munasebetlerini pekitmege tırıştı.
