Aprel 25-te, bazarertesi künü Qırımtatar Milliy Meclisi faaliyetiniñ yasaq etilmesi boyunca keçirilgen toplaşuvda Rusiyege boysunğan Qırım Yuqarı mahkemesi ukrain tilinden tercimannı celp etti. Mütenasip muracaat Moskva tarafından tayınlengen yarımada prokuraturası tarafından etildi ve qısqa muşavereden soñ mahkeme tarafından qanaatlendirildi.
Adliyeci Cemil Temişev, «fevral 26 işi boyunca» qabaatlanğan ATR-niñ sabıq operatorı Eskender Nebiyev boyunca cinaiy işniñ malümatını ceryandan çıqarmağa muracaat etti, çünki o Meclis azası degil.
Bundan da ğayrı, aprel 25-te keçirilgen toplaşuvda mahkeme rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını davağa qoştı.
Rusiyeli Qırım Ana yasasına binaen, yarımadada üç devlet tili qullanıla: ukrain, rus ve qırımtatar tilleri.
Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
