Link açıqlığı

Qırımdaki mahkemede Poklonskayanıñ Meclis faaliyetiniñ toqtatılması boyunca qararını davağa qoştılar


Qırımdaki mahkemede Poklonskayanıñ Meclis faaliyetiniñ toqtatılması boyunca qararını davağa qoştılar

Rusiyege boysunğan Qırım prokuraturasınıñ temsilcileri Qırımtatar Milliy Meclis faaliyetiniñ yasaq etilmesi boyunca mahkemede rusiyeli prokuror Natalya Poklonskayanıñ Meclis faaliyetiniñ toqtatılması boyunca qararını dava malümatlarına qoşmaq içün muracaatta bulundılar. Meclisniñ imayecileri buna qarşı çıqtı, amma mahkeme eyyeti bu muracaatnı qanaatlendirdi. Bu aqta Qırım.Aqiqatqa ceryan iştirakçilerinden biri bildirdi.

Onıñ qayd etkenine köre, qabaatlağan tarafına qol tutqan Qırım Milletlerara munasebetler ve sürgün etilgen vatandaşlarnıñ meseleleri boyunca Devlet Komitetiniñ temsilcisi toplaşuvda yoq. Mahkemeci onıñ yoq olğanına baqmadan, ve Meclis adliyecisi Cemil Temişevniñ narazılığına baqmadan, taqiqatnı başlamağa teklif etti.

Aprel 25-te Aqmescitte Rusiyege boysunğan Qırım Yuqarı mahkemesinde Qırımtatar Milliy Meclisi faaliyetiniñ yasaq etilmesi boyunca nevbetteki toplaşuv keçirile.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG