Rusiye işğal etilgen Qırımdaki «Simferopol» ava limanını federal emiyetini taşığan ava limanları cedveline kirsetti.
Mütenasip qarar Rusiye ükümetiniñ saytında derс etildi.
«Federal emiyetini taşığan ava limanları cedveline federal emiyetini taşığan Moskva, Sankt-Peterburg, Aqyar ve Federatsiya subyektleriniñ memuriy merkezleri (paytahtları) ile ava alâqalarınıñ teşkil etilmesi içün kerek olğan ava limanları kire», – dep yazılğan vesiqada.
Qırımda Aqmescit ava limanı Rusiyeden yolcu uçaqlarını qabul etken yekâne ava limanı ola.
2014 senesi Qırım Rusiye tarafından işğal etilgen soñ Qırım ava limanları Ukraina ükümetiniñ qararı ile qapatıldı. O yerge ve andan ketken er angi uçuşlar Ukraina qanunlarını ve halqara qaidelerini bozğan sayıla, bunıñ içün avia şirketleri Ukraina ve İCAO halqara sanktsiyalarğa oğray bile.
Şimdiki vaqıtta Qırımğa tek Rusiye şirketleri uçuşlarnı amelge keçire.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
