Link açıqlığı

Aprel 22-de, cuma künü Aqyardan Keriçke er kün yürecek ilk tren işke tüşürildi. Bu aqta Qırım.Aqiqatqa Aqyar demiryol vokzalınıñ malümat hızmeti bildirdi.

Yerli kütleviy haber vastalarında derc etilgen cedvelge köre, tren er kün Aqyardan saat 21:30 çıqa ve Keriçke kelecek kün saba saat 06:00-da kele. Yol 8 saat 30 daqqa ala. Keriçten tren er kün saat 22:10 çıqa ve Aqyarğa kelecek saba saat 6:50 kele. Yol 8 saat 40 daqqa ala.

Aqyardan Keriçke qadar kupe vagonınıñ bilet fiyatı 1532 ruble (600 grivnadan biraz ziyade), bu fiyatqa yataq çamaşırı kire, platskart bileti ise eki qat ucuz – 828 ruble (tahminen 331 grivna).

Eki tarafqa ketken trenler Canköy ve Aqmescit stantsiyalarını keçe.

Aqyar demiryol vokzalınıñ malümat hızmetiniñ bildirgenine köre, Canköy ve Keriçni keçken «Aqmescit – Moskva» treni «endi çoqtan lâğu etilgen». Bundan evel Qırımdaki Rusiye memurları tren rentabel olmağanını, yani kereksiz olğanını bildirgen ediler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG