Link açıqlığı

Aqmescitte qırımtatar tilinde tasil bergen mekteplerniñ müdirlerine «idare etüvni bilme» mevzusı añlatıldı


Aqmescitte qırımtatar tilinde tasil bergen mekteplerniñ müdirleri içün «İdare etüvni bilme: meseleler, vazifeler ve olarnıñ umumtasil müessiseniñ inkişaf etmesi şaraitte çezüv yolları» mevzulı seminar keçirildi. Merasim Rusiyege boysunğan Qırım tasil, ilim ve gençler nazirliginiñ nezareti astında teşkil etildi.

Seminar çerçivesinde mektep müdirleri iş tecribesinen paylaştı, idare etüv faaliyeti, umumtasil müessise idarecisi ögünde turğan meseleler ve vazifeler aqqında ayttılar. Pedagoglar oca ve talebe, oca ve ana-baba, oca ve mektep müdiri arasındaki munasebetler quruvınen bağlı pedagogika bilme meseleleri boyunca master-klass taqdim ettiler.

2015 senesi küzde qırımtatar tilinde tasil bergen mekteplerniñ müdirleri mesleat-muşavere organ olaraq öz şuranı teşkil etmege teşebbüs bildirdiler.

Qırım.Aqiqat bildirgenine köre, 2015/2016 oquv yılı başından yarımadada 5083 bala qırımtatar tilinde tasil ala, bu ise bütün talebelerniñ 2,76 fayızını teşkil ete. Qırımtatar tilinde tasil bergen 15 umumtasil müessise çalışa. Umumen olaraq, Qırımda qırımtatar tilinde tasil 53 umumtasil müessisede berile.

XS
SM
MD
LG