Bu sene başından Qırımnı ziyaret etken turistlerniñ sayısı 334,8 biñ insannı teşkil etti, bu ise, keçken senege köre, 18,7 fayızğa ziyadedir, dep belley Rusiyege boysunğan Qırım kurort ve turizm naziri Sergey Strelbitskiy. Bunı «Novosti Krıma» bildire.
«Sene başından Qırım Cenüp yalısında turistlerniñ bütün sayısından 56 fayızı, Qırımnıñ ğarbiy yalısında – 33 fayızı, Qırımnıñ şarqiy yalısında – 10 fayızı, diger regionlarda – 0,5 fayızı raatlandı. Çalışqan şifahane-kurort ve musafirhane müessiseleri toldurılmasınıñ orta seviyesi 26 fayıznı teşkil ete, keçken sene aynı vaqitta ise 22,6 fayıznı teşkil ete edi», – dep bildire Strelbitskiyniñ neşiri.
Bunen beraber Rusturizm Qırımda turistlerniñ sayısını degil de, raatlıq seviyesini arttırmağa çağırdı. Rosturizmde işğal etilgen Qırımda raatlıq şaraitini eyileştirmek kerek olğanını da qayd eteler.
Şimdiki vaqıtta Qırım kurort ve turizm naziri vazifesini eda etken Sergey Strelbitskiy bu sene Qırımğa 4,9 million turistniñ kelecegini tahmin etken edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
