Link açıqlığı

Saatnıñ esas haberi

Qırımda orta aylıq 22 biñ rubleden ziyade oldı – Krımstat


Rusiyege boysunğan Qırım devlet statistika hızmeti yarımadada orta aylıq miqdarınıñ 22687 rubleni teşkil etkenini qayd etti, bu aqta hızmetniñ saytında bildirile.

«Qırım Cumhuriyetiniñ bütün teşkilâtlar boyunca 2016 senesi fevral ayında berilgen orta aylıq miqdarı 22687 ruble teşkil etti. Yanvar ayına köre, aylıq miqdarı 0,5 fayızğa, 2015 senesi fevral ayına köre, 20 fayızğa arttı», – dep yazılğan saytta.

Qırım statistiklerniñ malümatına binaen, aylıq boyunca borclarnıñ miqdarı artmağa devam ete.

«Umumen olaraq iqtisat faaliyetiniñ nezaret astında tutulğan çeşitleriniñ dairesinde aylıq boyunca borcnıñ miqdarı 2016 senesi aprel 1 kününde 83031 biñ rubleni teşkil etti, ve 2016 senesi mart 1 kününe köre 0,6 fayızğa, yani 530 biñ rublege arttı», – dep bildire Krımstat.

Qırım ealiniñ emek merkeziniñ malümatına köre, 2016 senesi mart ayınıñ soñunda qayd etilgen meşğul olmağan vatandaşlarnıñ sayısı 10,3 bin insan oldı, olardan işsiz olğanlar – 8,5 biñ, qayd etilgen işsizlik seviyesi ise iqtisadiy taraftan faal olğan ealiniñ 0,9 fayızını teşkil etti.

Moskva devlet universitetiniñ professorı, İçtimaiy siyaset mustaqil institutınıñ regional programmanıñ müdiri Natalya Zubareviçniñ fikirince, Qırımda ealiniñ kerçek kelirleriniñ seviyesi Rusiye Federatsiyasına köre daa tez eksile, bu ise yarımadada inflâtsiya seviyesi yüksek olğanından sebeptir. Onıñ sözlerine binaen, Qırımda, Rusiyeniñ diger regionlarına köre, fiyatlar daa tez öse edi, demek ki, eali kelirleri eksile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG