Aprel 22-de, cuma künü Aqyarda politsiya hadimleri cami etrafını sardı ve içinde olğan er insannıñ vesiqaları ve cep telefonlarını teşkerdi.
Bu aqta Qırım qamaçavı aktsiyası ştabınıñ yolbaşçısı Lenur İslâmov Facebook saifesinde bildirdi.
«Bugün Aqyarda (Sevastopolde) cuma namazından soñ rus politsiyası keldi, cami etrafını sardı, ve er kesten pasport ve cep telefonlarınıñ malümatını köstermege talap etti», – dep yazdı İslâmov.
Uquq qoruyıcılar rusiyeli mahsus hızmetler Qırımda musulman cemiyetleriniñ temsilcilerinen ekstremizmniñ ögüni almaq içün subetler keçirgeni aqqında çoq kere haber ete ediler.
Qırımtatar Milliy Meclis ve uquq qoruyıcı teşkilatları bir qaç sefer ilân etkenlerine köre, 2014 senesi Qırım Rusiye tarafından işğal etilgen soñ yarımadada qırımtatarlarğa qarşı repressiyalar yüz bere, amma Qırımnıñ rusiyeli akimiyeti bunı red ete.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
