Rusiyede yasaqlanğan terroristik teşkilâtı olaraq tanılğan «Hizb ut-Tahrir» teşkilâtında iştirak etkeninde qabaatlanıp, Rusiye tarafından işğal etilgen Qırımda yaqalanğan Qırım uquq qoruyıcısı, İnsan aqları boyunca Qırım kontakt gruppasınıñ azası Emir-Usein Kukuğa «açıq yürekten itiraf etmege» teklif ettiler. Bu aqta aprel 22-de, cuma künü Emir-Usein Kukunı ziyaret etken adliyeci Aleksandr Popkov Facebook saifesinde bildirdi.
«Emir boldurğan kibi körüne, ya da, bilmeyim, körüngendir. O yerdeki şarait, yımşaq aytqanda, yaramay. Bedence onı tiymeyler. Oña bazı vaqıtları Federal havfsızlıq hızmetiniñ tanış hadimi Kompaniytsev kele, oña açıq yürekten itiraf etmesiniñ imtiyazlarını güzel añlata. Emir çorlanıp tintüv aqqında, öz işi aqqında, mantıqsız ve boş olğan qabaatlar, hizbiylerniñ ilk işinen qıyaslama aqqında añlata», – bildirdi Popkov.
Adliyeciniñ sözlerine köre, eki iş bir stsenariy boyunca inkişaf ete: er birinde Rusiye uquq qoruyıcıları dörter musulmannı yaqaladı, olardan birer slavân kişi (Yuriy Primov ve Vadim Siruk). Dört insandan biri terroristik toplulıq teşkil etkeninde, qalğanlar iştirak etkenlerinde qabaatlana.
«Qabaatnı tanımaq içün nasıldır şaatlar yardım ete, olar qabaatlı şahıslar öz dünyabaqışlarınen ve asılında Hizb ut-Tahrirniñ tarafdarları olğanı aqqında açıq-aydın olmağan delillerni ketireler. Eki işte nasıldır video/audio yazısı bar, anda «aşhanede» çeşit siyasiy mevzular muzakere etile: Qırım taqdiri, Rusiye, Ukraina, eki devlette islâmnıñ yeri, din qaideleri, çeşit noqta-i nazarlar, şu cumleden aynı bu «hizbiyler» aqqında laf eteler. Video gizli şekilde daa bir munaqaşa iştirakçisi tarafından yazılğan, o muzakerelerde faal iştirak ete, mahsus bazı kerekli mevzularnı aça, ve, ğaliba, mahsus hızmetlerniñ agenti ve mahsus yollanılğan şaat ola», – dep qayd etti Aleksandr Popkov.
Adliyeciniñ fikirince, bu iş boyunca esas delil «altmış saifelik nasıldır diniy ruhiy-lingvistik ekspertiza sayılacaqtır».
Bu sene fevral 11-12 künleri Rusiye uquq qoruyıcıları Qırımda islâmnı kütken insanlarnıñ evlerinde tintüvler keçirip, bir qaç kişini yaqaladı. Umumen olaraq, 14 insan yaqalandı, olarnıñ dörtü apis etildi: Yaltadan İnsan aqları boyunca Qırım kontakt gruppasınıñ azası Emir-Usein Kuku, Yalta rayonınıñ sakini Enver Bekirov, Aluşta regionınıñ sakini Muslim Aliyev ve Yaltalı Vadim Siruk. Federal havfsızlıq hızmetiniñ taqiqatçıları olarnı Rusiyede yasaq etilgen «Hizb ut-Tahrir» teşkilâtınıñ faaliyetinde iştirak etkenlerinde qabaatladı. Episi dört kişi şimdiki vaqıtta Aqmescitteki SİZOda buluna.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
