Link açıqlığı

Qırım prokuraturası: Rusiye Devlet Dumasına saylavlarnıñ Qırım territoriyasında keçirilmesi qanunsızdır


resimli foto

Ukraina Baş prokuraturası yanındaki Qırım Muhtar Cumhuriyeti prokuraturası Rusiye Devlet Dumasına saylavlarnıñ Qırım yarımadası territoriyasında keçirilmesi qanunsız olğanı aqqında hatırlata. Bu aqta Qırım.Aqiqat malümat soratmasına prokuratura bergen cevabında bildirile.

«Rusiye Federatsiyası Devlet Dumasına saylavlarnıñ Yarımada territoriyasında keçirilmesi Ukraina qanunlarını ve halqara uquq qaidelerini boza», – dep qayd ettiler Qırım prokuraturasında.

Prokuraturada qayd etkenlerine köre, saylavlarnıñ teşkil etilmesinde iştirak etken ya da saylavlarda iştirak etecek şahıslarnıñ mesüliyetke celp etilmesi «er konkret vaziyette Ukraina Cinaiy kodeksiniñ talaplarına köre, «Vatandaşlarnıñ aq-uquqları ve azatlığını temin etüv ve Ukrainanıñ vaqtınca işğal etilgen territoriyasında uquq nizamı aqqında» Ukraina qanunınıñ qaidelerini köz ögünde tutıp al etilecektir».

Ukraina Tışqı işler nazirligi de Rusiye Devlet Dumasına saylavlarnıñ Qırım territoriyasında keçirilmesini qanunsız tanığanını ve deputatlarğa Qırım namzetlerine qarşı mütenasip tedbirler keçirilecegini ilân etti.

Rusiye Federatsiyası Devlet Dumasına saylavlarnıñ sentâbr 18-de keçirilmesi planlaştırıla. Olarnı qarışıq sistema boyunca keçirmege niyetleneler: 250 deputat firqa cedvelleri ve daa 250 deputat bir mandatlı okrugları boyunca saylanacaq.

Qırımda Rusiye saylavları içün 4 okrug teşkil etildi: bir danesi Aqyarda ve üçü «cumhuriyet» okrugı olacaq. Firqa cedvellerine regional gruppalar da kirecek, ve saylavlarda iştirak etecek siyasiy küçler şu cumleden Qırım deputatlarını da namzet etip köstermek kerekler.

«Yedinaya Rossiya» firqası Qırım territoriyasında «primaries» keçirdi. Onda rusiyeli Qırım parlamentiniñ reis muavinleri Andrey Kozenko ve Konstantin Baharev, rusiyeli Qırım akimiyetiniñ yolbaşçı muavinleri Ruslan Balbek, Nikolay Yanaki, Mihail Şeremet ve diger Qırım siyasetçileri, deputatları ve memurları iştirak ettiler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG