Aprel 21-de Herson vilâyetiniñ Geniçeskteki urba tükânında yüz bergen patlavnıñ sebebi patlatılğan granata oldı. Bunı Herson vilayetiniñ Milliy politsiyasında bildireler.
Geniçesk politsiya bölüginiñ başı Andrey Leşenkonıñ Qırım.Aqiqat saytına bildirgen malümatına binaen, yüz bergen vaqia 194 maddesiniñ 2-ci parçası ve 195 maddesine köre isbatlaylar. Cinaiy iş açıldı.
«Bu vaqia terror eylemi olaraq tanılmay. Onı Novoalekseyevkada yüz bergen patlav ile bağlamaymız», – dedi o.
Herson vilayetiniñ Milliy politsiyasınıñ saytında berilgen malümatqa köre, vaqia yüz bergen yerni baqqanda patlav tehnikleri alqa ile mil ve tanklarğa qarşı qullanılğan reaktiv granatanıñ parçasını taptı. Alınğan şeyler tedqiq etilmesine teslim etildi.
Şimdiki vaqıtta bu cinayetnen bağlı olğan şahıslarnı belgilemek içün tadqiq-operativ işleri alıp barıla. Taqiqat devam ete.
Ukraina Cinaiy Kodeksine binaen, qayd etilden maddeler boyunca – «biriniñ mülküni aselet yoq etüv» ve «mülkniñ yoq etilmesi telükesi» – cinayetlerni yapqanlar vatandaşlarnıñ 50 minimal keliri miqdarında para cezası ya da bir yılğa qadar tüzetme işleri, ya da altı ayğa qadar yaqalanmasınen cezalana bile.
Aprel 21-de Geniçeskte bazar kirişi yanında patlav yüz berdi. Vaqia yüz bergen yerge politsiya ve «Azov» polkunıñ askerleri keldi. Patlav neticesinde urba ve ayaqqap tükânınıñ ekinci qatında pencereler patladı. Zararlanğanlar yoq.
Aprel 15-te Geniçesk rayonınıñ Novoalekseyevka qasabasında, işğal etilgen Qırım ile memuriy sıñırğa yaqın bir yerde, Odessa nomeraları olğan VAZ-2101 maşinasında patlav yüz berdi. Bunıñ neticesinde bir kişi elâk oldı, dört insan yaralandı. Patlav terror eylemi olaraq tanıldı. Patlav teşkilâtçıları daa tapılmadı.
