Ukraina Yuqarı Radasınıñ Söz serbestligi boyunca komiteti Avropada havfsızlıq ve işbirlik teşkilâtınıñ (OSCE) resmiy eyeti ile işğal etilgen Qırımnı ukrain temsilcilerinen beraberlikte kütleviy haber vastalarınıñ serbestligi vaziyetini ögrenmek ve OSCE toplaşuvında neticelerni baqmaq içün ziyaret etmek teklifi ile OSCE kütleviy haber vastaları serbestiligi meseleleri boyunca temsilcisi Duni Miyatoviçke muracaatta bulunmaq qararını aldı.
Bu qarar aprel 21-de Söz serbestligi ve informatsion siyaseti meseleleri boyunca komitetiniñ toplaşuvında qabul etildi, bu aqta malümat ukrain parlamentini saytında bildirile.
«Bugünki vaziyette jurnalistlerniñ zenaat aqlarını bozuvları, mustaqil kütleviy haber vastalarınıñ qapatılması, daa çalışqan kütleviy haber vastalarınıñ Rusiyege boysunğan Qırım akimiyetiniñ nezareti astında bulunması adet oldı. Qırım sakinleri qorquzıldı, bunıñ içün şahsiy fikirlerini açıq bildirmege ve mustaqil jurnalistlernen çalışmağa red eteler», – qayd ettiler komitet toplaşuvında.
Aprel 19-da saba Rusiyege boysunğan Qırım prokurorı Natalya Poklonskaya Qırım jurnalistine qarşı Rusiye qanunlarınıñ Kütleviy haber vastalarında bastırğan maqaleleri içün «separatizm» aqqında maddesi boyunca cinaiy iş açılğanını bildirdi. O, jurnalistniñ adı ve soyadını aytmadı. Bundan soñ jurnalistnıñ adı Mıkola Semena olğanı belli oldı. Kütleviy haber vastalarınıñ malümatına binaen, aprel 19-da tintüvler Aqmescit, Yalta ve Aqyarda 7 adres boyunca keçirildi.
Mıkola Semenanı Federal havfsızlıq hızmetinde sorğuğa çektiler, soñra o çıqmamaq şartınen azat etildi.
Bundan soñ Avropada havfsızlıq ve işbirlik teşkilâtında (OSCE) Rusiye tarafından işğal etilgen Qırımda söz ve haber vastaları serbestligi bulunğan telükeli vaziyeti boyunca qasevet çekkenini bildirdiler. Amerika Qoşma Ştatları da Federal Havfsızlıq hızmetiniñ Qırımda jurnalistlerge qarşı yapılğan reydlerini toqtatmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
