Link açıqlığı

Saatnıñ esas haberi

AQŞ Devlet departamenti Rusiyeni Meclisni «ekstremist teşkilât» olaraq tanımaq qararını lâğu etmege çağıra


Con Kirbi
Con Kirbi

Amerika Qoşma Ştatlarınıñ Devlet departamenti Rusiyeni Qırımtatar Milliy Meclisni «ekstremistik teşkilâtı» olaraq tanımaq qararını lâğu etmege çağırdı. Bu aqta departament saytında matbuat kâtibi Con Kirbige bağlantı ile bildirile.

«Biz Rusiye Federatsiyasını yaqında Adliye nazirligi tarafından qabul etilgen Qırımtatar Milliy Meclisni «ekstremistik teşkilâtı» olaraq tanımaq qararını, bundan da ğayrı, Qırım akimiyetiniñ bu demokratik müessiseniñ faaliyetini toqtatmaq qararını lâğu etmege çağıramız», – dep aytı Con Kirbi.

AQŞ Devlet departamentinde Meclis qırımtatarlarnıñ menfaatlarını ve medeniyet asabalığını qoruğan müim bir organ olğanını qayd ettiler.

Departamentte Rusiye ükümetiniñ Ukrainada qırımtatarlarğa nisbeten öz qanunlarını qullanmaq iç bir aqqı, şu cumleden uquqiy aqları yoq olğanını bildirdiler.

«Meclisniñ yasaq etilmesi olarnı toplaşuvlar keçirmekten, kütleviy haber vastalarında fikirlerini bildirmekten, kütleviy merasimlerni teşkil etmekten marum etecek, bu ise esas demokratik printsiplerine zıt kele», – dep aytıla amerikan tarafınıñ beyanatında.

Bundan da ğayrı, Vaşingtonda Qırımda işğalge qarşı çıqqan insanlarnıñ, hususan qırımtatarlar ve diger milliy ve diniy azlıqlarnıñ aq-uquqları bozulğanı aqqında hatırlattılar.

«Bu kibi bozmalar sebepsiz yaqalamalar, köteklemeler, politsiyanıñ evlerde ve diniy yerlerde reydlerni keçirmelerinden ibaret. Biz kene de Rusiyeni Qırımnıñ işğalini toqtatmaq ve Ukraina territoriyasınıñ bu parçasınıñ nezaretini qaytarmağa çağıramız. Qırımnen bağlı sanktsiyalar işğal devam etecegine qadar deñişmey qalacaq», – qayd ettiler AQŞ Devlet departamentinde.

Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.

Aprel 13-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi. Aprel 15-te Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG