Ukraina prezidentı Petro Poroşenko aprel 21-de Romaniyada resmiy ziyaret ile bulunıp, Rusiye tarafından devam etken tecavuz vaziyetinde Ukraina ve Romaniya Qara deñiz regionında havfsızlıq meselesine büyük diqqat ayırğanlarını ve onıñ temin etilmesi boyunca yañı usullar qullanmağa teklif etkenlerini bildirdi. O, aynı vaqıtta, yarımada işğal etilgen soñ Qırımnıñ Rusiye Federatsiyası tarafından militarizatsiyası meselesini de muzakere etti.
Bu aqta ukrain devleti reisiniñ matbuat hızmeti bildire.
«Biz işğal etilgen Qırımnıñ Rusiye tarafından yapılğan militarizatsiyasını takbih ettik. Qara deñiz regionında havfsızlıq saasında işbirlik boyunca yañı usullarnı muzakere ettik» – dep qayd etti Petro Poroşenko Romaniya prezidenti Klaus Yohannis ile beraberlikte keçirilgen matbuat konferentsiyasında.
Ukraina prezidentiniñ qayd etkenine köre, bu mesele muzakerelerniñ esas meselelerinden biri edi.
«Biz Romaniyanıñ NATO-da beraberlikte teşkil etilgen flot boyunca teşebbüsine qol tutamız, ve qayd etem ki, o NATO tarafından qabul etilgen soñ oña qoşulmağa azırmız», – dep ayttı Petro Poroşenko.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
