Link açıqlığı

İşğal etilgen territoriyalar boyunca ukrain naziri: Qırımnıñ arbiy yolnen qaytarılması mantıqsızdır


Ukrainanıñ yañı ükümetiniñ işğal etilgen territoriyalar boyunca nazir Vadim Çernış Rusiye tarafından işğal etilgen Qırımnıñ Ukraina nezaretine arbiy yolnen qaytarılmasını mantıqsız saya.

Bu aqta o Gromadske içün bergen intervyusında bildirdi.

«Sizge aytayım ki, elbet, arbiy taraf aqqında, fikirimce, iç laf olmaması kerek, ve bellesem, bu mantıqlı ve añlayışlıdır. Bu kibi aqiqaten ekinci yerde bulunğan arbiy maşina ile küreşmek zordır, Qırım aqiqaten pek küçlü arbiy bazasına çevirildi», – dep ayttı o.

«Mencesine, asılında, em Donbas, em de Qırım boyunca santıraç oynamaq kerektir, «atlı asker ücümlerini» tüşünmemek kerek. Bu pek adiy bir yoldır – qıyın meselelerge tek bir cevapnı bilmek: açıq ücüm etmek», – qoştı o.

Onıñ qayq etkenine köre, duşmanğa yardım etmemek içün, Qırımnıñ qaytarılması boyunca kerçek planını ilân etmek kerekmey.

Ukraina nazirler kabineti aprel 20-de keçirilgen toplaşuvda Vaqtınca işğal etilgen topraqlar ve memleket içinde köçip kelgenlerniñ meseleleri boyunca Nazirlikni qurmağa qarar aldı. Vadim Çernış nazirlikniñ yolbaşçısı vazifesine tayinlendi. Bundan evel o, Donbassnıñ ğayrıdan tiklenilmesi meseleleri boyunca Devlet agentliginiñ yolbaşçısı edi.

Evel Ukraina nazirler kabinetı yanında teşkil etilgen Qırım ve Aqyar meseleleri boyunca Devlet hızmeti bu nazirlikniñ terkibine kirecektir.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG