Ukraina Tışqı işler naziri Pavel Klimkin rusiyeli zenaatdaşı ile telefonnen laf etti. Munaqaşa çerçivesinde bugünki künde Rusiyeniñ nezareti astında bulunğan qırımtatar Meclisiniñ yarımadada faaliyetini yasaq etmek ıntıluvı muzakere etildi.
Bu aqta Pavel Klimkin Tvitterde bildirdi.
«Sergey Lavrov ile Rusiyede bulunğan siyasiy mabuslarımız, Donbasstaki vaziyet ve Meclisniñ yasaq etilmesi aqqında laf ettik», – dep yazdı nazir.
Diger tafsilatlı malümatnı Ukraina Tışqı işler nazirliginiñ reisi bildirmedi.
Rusiye Tışqı işler nazirliginiñ saytında Sergey Lavrov ve Pavel Klimkinniñ aprel 20-de ötkerilgen telefon muzakereleri aqqında malümat yerleştirilgen, amma o yerde Qırımtatar Milliy Meclisi faaliyetiniñ yasaq etilmesi aqqında bildirilmey. Rusiye nazirliginde muzakereler ukrain tarafınıñ teşebbüsinen ötkerilgenini qayd ettiler.
«Minsk añlaşmalarınıñ ömürge keçirilmesi, bundan da ğayrı, bu sene aprel 18 Rusiye ve Ukraina prezidentleriniñ telefon muzakereleriniñ inkişafına eki taraf munasabetlerinen bağlı bir sıra meseleler muzakere etildi», – dep aytılğan Rusiye TİN-niñ qısqa beyanatında.
Aprel 13-te Rusiyege boysunğan Qırım prokurorı Natalya Poklonskaya yarımadada Qırımtatar Milliy Meclisiniñ yarımadada faaliyetini toqtatmaq qararını alğanını bildirdi. Onıñ aytqanına köre, Meclis şeer ve belediye kütleviy haber vastalarından faydalanamaz, er angi kütleviy tedbirni keçiremez, bank ödemelerini qullanamaz ve asılında iç bir işnen oğraşamaz.
Bundan evel Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Mahkeme taqiqatı devam etmekte.
Meclis reberleri mahkeme prokuraturanıñ talaplarını yerine ketirecek, dep tahmin ete. Ukraina Baş prokuraturası Meclisniñ qanunsız yasaq etilmesi boyunca cinaiy iş açılğanını bildirdi.
Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
