Link açıqlığı

AQŞ çetel memleketlerge yayınlama reberligi Qırımda Azatlıq Radiosınıñ müellifleri olğan mustaqil mühbirlerniñ taqip etilmesini takbih etti


Amerika Qoşma Ştatlarında çetel memleketlerge yayınlama bir sıra amerikalı media-şirketlerini idare etken Yayınlama müdirleri şurası Rusiye tarafından işğal etilgen Qırımda mustaqil jurnalistlerniñ taqip etilmesini takbih etti. Bu jurnalistler arasında Azat Avropa Radiosı - Azatlıq Radiosınen işbirlik yapqan mühbirlerdir.

Böyle Qırım jurnalistlerniñ biri Nikolay Semenağa qarşı bildirilecek cinaiy qabaatlar «esassız ve olarnıñ tek maqsadı mustaqil seslerini ve farqlı fikirlerni yoq etmektir», dep ayttı Şura müdiri Con Lansing. «İç bir ükümet jurnalistniñ işi serbest yapılmasına mania olmaması kerek», – qayd etti o.

Şura reisi Ceff Şell, öz tarafından, böyle ayttı: «Mühbircilik cinayet degil». Diger haber vastalarınıñ kibi, Azat Avropa Radiosı - Azatlıq Radiosınıñ jurnalistleri de öz işini Qırımda qorquzma ve yaqalamadan qorqmayıp yapmaları kerek, dep qayd etti o.

Yayınlama müdirleri şurası aprel 20-de, çarşenbe künü saba Kiyevdeki AQŞ elçiliginiñ temsilcisi Con Lalli böyle bildirgenini hatırlattı: «Amerika Qoşma Ştatları Qırımda jurnalistlerniñ yaqalanuvını qatiyen takbih ete ve Rusiye ükümetiniñ haber vastalarına qarşı yapılğan politsiya reydlerini toqtatmağa çağıra».

«Bu areketler Rusiye ükümeti tarafından em Rusiyede, em işğal etken Qırımda mustaqil seslerniñ daa qattı yoq etilmesiniñ nevbetteki misalleri ola», – dedi o.

Aprel 19-da Qırımda Rusiye uquq qoruyıcıları mustaqil jurnalistlernen bağlı Qırımnıñ yedi sakininiñ evinde tintüvler keçirdi. Olarnıñ arasında Azat Avropa Radiosı - Azatlıq Radiosınen işbirlik yapqan mühbirlerdir.

Rusiyege boysunğan Qırım prokuraturası Qırım jurnalistleriniñ biri olğan Nikolay Semenağa qarşı cinaiy iş açqanını, onıñ mühbir işlerinde «ekstremist faaliyetini» yapqanında ve «Rusiye topraq birdemligini bozmaq» içün çağırğanında qabaatlağanını bildirdi. Semena qabaatnı red ete, ve Azatlıq Radiosı Qırım.Aqıqat ile işbirlik tutqanını da red ete.

Bundan da ğayrı, Rusiyege boysunğan yarımada prokurorı Azatlıq Radiosınıñ leyhası olğan Qırım.Aqiqat saytına irişimni qapatmağa çağırdı, bu saytnıñ maqsadı Rusiyeni itibardan tüşürmek olğanını, o milletlerara munasebetlerni bozğanını ve ekstremizmni teşviqat etkenini bildirdi.

XS
SM
MD
LG