Ukraina Baş prokuraturasınıñ Qırım Muhtar Cumhuriyetiniñ prokuraturası aprel 18-19 künleri yüz bergen «Hizb ut-Tahrir işi» boyunca tintüvler ve yaqalanuvlar ve Qırım mühbirlerinde tintüvlernen bağlı cinaiy işlerni açtı. Bu aqta prokuraturanıñ matbuat hızmeti bildire.
«Vaqtınca işğal etilgen territoriyası olğan Qırım yarımadasında qanunsız teşkil etilgen organlar endi qacıncı sefer uydurılğan sebeplerge esaslanıp insan aqları ve serbestligi ve vatandaşnıñ serbestligi aqqını, şahsiy toqunmama ve evge ya da şahısnıñ diger mülküne toqunmama aqlarını bozalar, bu aqlar tek Ukraina Esas qanunı tarafından degil de, bir sıra halqara aktlarnen kefil olunğan», – dep aytıla beyanatta.
Cinaiy işler Ukraina Cinaiy Kodeksiniñ 146 maddesi 2-ci parçasında (insannı qanunsız azatlıqtan marum etme) ve Ukraina Cinaiy Kodeksiniñ 162 maddesi 2-ci parçasında (evge toqunmama aqnıñ bozuvı) qayd etilgen cinayetler alâmetleri boyunca açıldı.
Yuqarıda qayd etilgen cinaiy işlerniñ malümatları Ukraina Baş prokuraturasına teslim etildi.
Aprel 19-da, salı künü Rusiyege boysunğan Qırım prokurorı Natalya Poklonskaya Qırım jurnalistine qarşı Rusiye qanunlarınıñ Kütleviy haber vastalarında bastırğan maqaleleri içün «separatizm» aqqında maddesi boyunca cinaiy iş açılğanını bildirdi. O, jurnalistniñ adı ve soyadını aytmadı. Bundan soñ jurnalistnıñ adı Nikolay Semena olğanı belli oldı. Onıñ oğlu Dmitriyniñ bildirgenine köre, uquq qoruyıcılar tintüv keçirgende jurnalistnıñ Radio Svobodanıñ Qırım.Aqiqat leyhası ile alâqalarını qıdırğanlar. Uquq qoruyıcılar eki bilgisayar, malümat taşıyıcılarını alıp, jurnalistni sorğuğa alıp ketkenler.
Mıkola Semena Qırımdan çıqmamaq şartınen azat etildi. O, «Rusiyeniñ topraq bütünligini bozmaq çağıruvı» boyunca qabaatta özüni qabaatlı olğanını red ete.
Adliyeci Emil Kurbedinov bildirdi ki, tintüvden soñ daa eki jurnalist FSBge alıp ketirildi.
Rusiyeniñ Qırım prokuraturası saytında daa bir qaç jurnalistlerde taqiqat işleri alıp barılğanı aqqında malümat peyda oldı. Olarnıñ adları bildirilmey. Kütleviy haber vastalarınıñ malümatına binaen, tintüvler Aqmescit, Yalta ve Aqyarda 7 adres boyunca keçirildi.
Ukraina haber siyaseti nazirligi bildirdi ki, nazirlik Rusiye işğal etken Qırımda jurnalistlerniñ evlerinde keçirilgen tintüv ve olarnıñ yaqalanmasından sebep halqara teşkilâtlarğa muracaat etti. OSCE Qırımda ifade serbestligi telüke altında olğanından qasevetlengenini bildirdi.
Ukraina mustaqil media iş birligi yolbaşçısı Yuriy Lukanov Qırım jurnalistleriniñ evlerinde keçirilgen tintüvlerni serbest matbuatqa basqı dep adladı. Onıñ bildirgenine köre, UMMİB halqara teşkilâtlardan vaziyetke tesir etmege rica etecek.
