Avropa komissiyası Avropa parlamenti ve Avropa birligi Şurasına Ukraina vatandaşları içün vizalarnı lâğu etmege teklif ete. Bunı Avropa komissiyasınıñ matbuat hızmeti bildire.
Avropa Komissiyası Ukrainanı vatandaşları Şengen zonasını vizasız ziyaret ete bilgen memleketler sırasına qoşmağa teklif ete.
Avropa komissiyası keçken sene dekabr ayında Ukrainanıñ viza liberalizatsiyası areketleriniñ planları çerçivesinde bütün qaidelerge uyğanına müsbet qıymet kesken edi.
Avropa komissiyasınıñ fikirince, bu teklif Avropa parlamenti ve Avropa Birligi Şurasında qabul etilgen soñ biometrik pasportı olğan Ukraina vatandaşları Şengen zonasını 90 kün devamında ziyaret etmek içün viza almaycaqlar.
Aprel 19-da Ukraina prezidenti Petro Poroşenko bildirdi ki, Avropa komissiyası Ukraina içün Avropa Birligi ile viza rejiminiñ liberalizatsiyası boyunca tekliflerini Avropa parlamenti ve Avropa Birligi şurasına eñ yaqın «künleri, belki de, atta saatlerde» berecek.
Mart ayında Ukraina viza liberalizatsiyası boyunca areketler planlarınıñ talaplarını yerine ketirdi. Avropa komissiyası aprel ayınıñ soñuna qadar Ukraina vatandaşlarına «şengen» memleketlerine qısqa müddetli ziyaretler içün vizalarnı qanun derecesinde lâğu etmege teklif etmeli. Bundan soñ teklifni Avropa parlamenti ve Avropa Birliginiñ 28 memleket azası tasdıqlamalı.
