Link açıqlığı

Ukraina Nazirler şurasınıñ aprel 20-de olıp keçken toplaşuvında qırımlı Emine Cepparnı Ukraina haber siyaseti naziriniñ birinci muavini vazifesine tayin etmege qarar alındı.

Bunı Ukraina haber siyaseti nazirliginiñ matbuat hızmeti bildire.

«Qırım ve qırımtatarlar mevzusı nazirlikniñ işinde eñ müim olıp qala. Al-azırda akimiyetniñ qanun çıqarıcı ve icra bölüklerinde qırımtatar halqınıñ vekilleri peyda ola», – dep ayttı Ukraina haber siyaseti naziri Yuriy Stets.

«Menim içün qırımtatar halqınıñ temsil organı olğan Meclis tarafından bu işke başlamaq teklifiniñ muzakere etilmesi müim edi. Ukraina prezidentiniñ qırımtatar halqı işlerinden vekâletlisi Mustafa Cemilevnen de laf ettik, onı balalıqtan bilem ve onıñ fikri menim içün pek qıymetli», – dep ayttı Emine Ceppar.

O, Qırım meselesinen oğraşmağa devam etecegini bildirdi.

«Avropa integratsiyası, nazirlikniñ temsiliy vazifeleri ve diger işler vazifelerime qoşulacaq», – dep qoştı Emine Ceppar.

2015 senesi oktâbr ayından başlap Emine Ceppar Haber siyaseti naziriniñ Qırım işlerinden mesleatçısı olğan edi. Onıñ esas vazifesi Ukraina ve çetelde Qırım mevzusını aydınlatmaq edi.

Emine Ceppar baş nazirniñ gumanitar meseleleri boyunca birinci muavininiñ milliy azlıqlar meselelerinden yardımcısı olıp çalıştı. Ukraina Tışqı işler nazirliginiñ Medeniy ve gumanitar işbirligi departamenti içtimaiy-gumanitar meseleleri bölüginiñ üçünci kâtibi vazifesinde çalışqan edi. ATR qırımtatar telekanalında bir sıra yayınnıñ alıp barıcısı ve müellifidir.

XS
SM
MD
LG