Herson vilâyeti ealisiniñ havfsızlığını teminlemek içün Ukraina Milliy gvardiyasınıñ «Azov» polku gece-kündüz nevbetçilik yapacaq patrullerni qoydı. Bunı «Azov» polkunıñ askerlerinden biri Qırım.Aqiqat saytına bildirdi.
«Novoalekseyevkada yüz bergen terakttan soñ «Azov» polku gece-kündüz nevbetçilik yapmağa başladı. Demir yol vokzalı, şeer merkezi, mektepler, insanlar toplu olğan yerlerni nezaret etemiz», – dedi o.
Onıñ bildirgenine köre, Geniçesk rayonı, em de Qırım ile memuriy sıñırda nevbetçilik yapıla.
«Terroristik telükelerge yol bermemek içün elimizden kelgenini yapacaqmız. Adamlar mında raat-raat kelip, raatlana bileler, qorqmasınlar», – dep ayttı «Azov» polkunıñ askeri.
Er bir askerniñ Ukraina Milliy gvardiyası şeadetnamesi ve silâ bar, olar insanlarnıñ vesiqalarını baqa ve şübe doğurğan maşinalarnı teşkere bileler.
Geniçesk politsiyasınıñ yolbaşçısı Andrey Leşçenko Qırım.Aqiqatqa bildirgenine köre, nevbetçilik resmiy şekilde yapıla ve yerli uquq qoruyıcı qurulışları ile muzakere etildi.
Aprel 15-te Geniçesk rayonınıñ Novoalekseyevka qasabasında, işğal etilgen Qırım ile memuriy sıñırğa yaqın bir yerde, Odessa nomeraları olğan VAZ-2101 maşinasında patlav yüz berdi. Bunıñ neticesinde bir kişi elâk oldı, dört insan yaralandı.
Patlav terror eylemi olaraq tanıldı ve, vilâyet ükümetiniñ bildirgenine köre, rayon territoriyasında toplu yaşağan qırımtatarlarğa qarşı yapılğan arekettir. Cinayetçilerni qıdıralar.
